ภาษาไทยระดับปริญญาตรีที่กัมพูชา
ទីក្រុងបាងកក ប្រទេសថៃ: តាមរយៈទីភ្នាក់ងារអន្តរជាតិ សម្រាប់ការអភិវឌ្ឍរបស់ប្រទេសថៃ ហៅកាត់ថា TICA រាជរដ្ឋាភិបាលថៃ និងរាជរដ្ឋាភិបាលកម្ពុជា ក៏បានព្រមព្រៀងឲ្យមានការបង្រៀនភាសាថៃ ថ្នាក់បរិញ្ញាបត្រ នៅសាកលវិទ្យាល័យភូមិន្ទភ្នំពេញ របស់ប្រទេសកម្ពុជា ដែលនឹងចាប់ផ្តើមឆ្នាំសិក្សាថ្មី នាខែកញ្ញាខាងមុខ។ រីឯភាសាខ្មែរ ក៏ត្រូវបានបង្រៀនរយៈពេល ៣ ឆ្នាំមកហើយនៅសាកលវិទ្យាល័យថៃ ក្នុងទីក្រុងបាងកក។
ក្នុងពេលជួបអ្នកកាសែតកម្ពុជា កាលពីព្រឹកថ្ងៃទី២៥កក្កដា ឆ្នាំ២០១២ អ្នកស្រី ពិន ស្រីដួរុងកាទុម ( Pin Sridurongkatum ) មន្ត្រីផ្នែកសហប្រតិបត្តិការ និងអភិវឌ្ឍន៍ របស់ TICA បានឲ្យដឹងថា កន្លងមកនៅសាកលវិទ្យាល័យភូមិន្ទភ្នំពេញរបស់កម្ពុជាមានបង្រៀនភាសាថៃ តែវគ្គខ្លីៗប៉ុណ្ណោះ។ ក៏ប៉ុន្តែនាពេលនេះ រដ្ឋាភិបាលកម្ពុជានិងថៃ បានព្រមព្រៀងគ្នាឲ្យមានការបង្រៀនភាសាថៃថ្នាក់បរិញ្ញាបត្រដល់និស្សិតកម្ពុជា រយៈពេល ៤ ឆ្នាំ នៅសាកលវិទ្យាល័យភូមិន្ទភ្នំពេញ ហើយនឹងចាប់ផ្តើមនៅខែកញ្ញា ក្នុងឆ្នាំសិក្សាថ្មីនេះ។
តំណាង TICA ក៏បានឲ្យដឹងថា នៅពេលនេះថៃបានបណ្តុះបណ្តាលនិស្សិតកម្ពុជា ២ នាក់ លើផ្នែកភាសាថៃ នៅក្នុងទីក្រុងបាងកក ដើម្បីក្លាយជាសាស្ត្រាចារ្យ សម្រាប់បង្រៀនភាសាថៃនៅក្នុងកម្ពុជា។
ដោយឡែក នៅទីក្រុងបាងកក ក្នុងសកលវិទ្យាល័យ Srinakharinwirot University ក៏មានបង្រៀនភាសាខ្មែរ ថ្នាក់បរិញ្ញាបត្រ សម្រាប់និស្សិតថៃផងដែរ។ ការសិក្សាភាសាខ្មែរនោះមានរយៈពេល ៤ ឆ្នាំ ដោយបានចាប់ផ្តើមដំបូងកាលពីឆ្នាំ២០១០។ សរុបទាំង ៣ឆ្នាំនេះ មាននិស្សិតថៃចំនួន ៤៧ នាក់ កំពុងសិក្សាបរិញ្ញាបត្រលើមុខវិជ្ជាភាសាខ្មែរ នៅសាកលវិទ្យាល័យ Srinakharinwirot។
លោកសាស្ត្រាចារ្យថ្នាក់បណ្ឌិតភាសាខ្មែរ Santi Pakdeekham ជំនួយការសាស្ត្រាចារ្យភាសាខ្មែរ របស់សាកលវិទ្យាល័យ Srinakharinwirot បានឲ្យដឹងថា ការបើកបង្រៀនមុខវិជ្ជាភាសាខ្មែរថ្នាក់បរិញ្ញាបត្រ នៅទីក្រុងបាងកកពេលនេះ ក្រៅពីបង្កើនកិច្ចសហប្រតិបត្តិការរវាងប្រទេសថៃនិងកម្ពុជា ក៏មានបំណងដើម្បីត្រៀមខ្លួនឈានទៅតភ្ជាប់សហគមន៍អាស៊ាន នៅឆ្នាំ២០១៥។
ក៏ប៉ុន្តែលោក Santi បានលើកឡើងថា បញ្ហាសាស្ត្រាចារ្យកម្ពុជា ដើម្បីមកជួយបង្រៀនភាសាខ្មែរដល់និស្សិតថៃ ជាការលំបាក។ ម្យ៉ាងទៀត ក៏មានការពិបាកក្នុងការបង្រៀន ភាសាខ្មែរនៅសាកលវិទ្យាល័យថៃ Srinakharinwirot ក៏ដោយសារតែមិនមានវចនានុក្រម ខ្មែរ-ថៃ និងថៃ-ខ្មែរ ឲ្យបានត្រឹមត្រូវទេនាពេលបច្ចុប្បន្ន។
រាជរដ្ឋាភិបាលថៃ តាមរយៈទីភ្នាក់ងារអន្តរជាតិ សម្រាប់ការអភិវឌ្ឍរបស់ប្រទេសថៃ ហៅកាត់ថា TICA ក៏បានផ្តល់អាហារូបករណ៍ដល់និស្សិតកម្ពុជា ក្នុងមួយឆ្នាំៗ ពី ២០០ នាក់ ទៅ ៣០០ នាក់។ ក្នុងពេលនេះ មានមន្ត្រីរាជការកម្ពុជា ៥ នាក់ មកពីក្រសួងអប់រំ ក្រសួងកិច្ចការនារី និងមកពីក្រសួងពាណិជ្ជកម្ម មកបន្តការសិក្សានៅទីក្រុងបាងកក នៅថ្នាក់អនុបណ្ឌិត លើមុខវិជ្ជាអប់រំ សេដ្ឋកិច្ច និងហិរញ្ញវត្ថុ។
មន្ត្រីរាជការវ័យក្មេងរបស់កម្ពុជា ៥ នាក់នោះ មកពីក្រសួងអប់រំ ២ នាក់ ក្រសួងកិច្ចការនារី ២ នាក់ និងក្រសួងពាណិជ្ជកម្ម ម្នាក់ ទទួលបានអាហារូបករណ៍របស់ TICA ដើម្បីមករៀនថ្នាក់អនុបណ្ឌិត លើមុខវិជ្ជាអប់រំ និងសេដ្ឋកិច្ចហិរញ្ញវត្ថុ នៅសាកលវិទ្យាល័យ Assumtion University ក្នុងទីក្រុងបាងកក ប្រទេសថៃ។
យុវតី គ្រី សុជាតា ជាមន្ត្រីរាជការនៅក្រសួងកិច្ចការនារី របស់កម្ពុជា ដែលកំពុងទទួលអាហារូបករណ៍សិក្សាថ្នាក់អនុបណ្ឌិត លើជំនាញសេដ្ឋកិច្ច និងហិរញ្ញវត្ថុ នៅសាកលវិទ្យាល័យ Assumtion University ក្នុងទីក្រុងបាងកក បានថ្លែងទៅកាន់ក្រុមអ្នកកាសែតកម្ពុជា កាលពីព្រឹកថ្ងៃទី២៥ ខែកក្កដា ឆ្នាំ២០១២ ថា ក្រុមនិស្សិតកម្ពុជាយើងមានការលំបាកផ្នែកភាសាអង់គ្លេស ដែលត្រូវប្រើប្រាស់ក្នុងការរៀនសូត្រ។ ភាសាអង់គ្លេសរបស់យើងនៅមានកម្រិត តែនៅទីនេះ គេនិយាយលឿន ហើយការបញ្ចេញសំឡេងក៏ខុសនឹងនៅប្រទេសយើង។ មុខវិជ្ជាសេដ្ឋកិច្ច និងហិរញ្ញវត្ថុ ក៏មានពាក្យបច្ចេកទេសច្រើន ទាមទារឲ្យយើងត្រូវស្រាវជ្រាវច្រើនថែមទៀត។ សាកលវិទ្យាល័យនោះមានកម្រិតស្តង់ដារអន្តរជាតិ ដែលមាននិស្សិតជាតិសាសន៍ច្រើនទៀតមកសិក្សាផងដែរ។
យ៉ាងណាក៏ដោយ អំពីការរស់នៅរបស់និស្សិតកម្ពុជា នៅប្រទេសថៃ មិនមានការលំបាកទេ ដោយ TICA ជាអ្នករៀបចំឲ្យ និងផ្តល់ប្រាក់ខែដល់និស្សិតកម្ពុជា ចំនួន ៧.០០០ បាត។ ក្នុងថ្នាក់រៀនក៏មានទំនាក់ទំនងល្អ រវាងនិស្សិតកម្ពុជា និងនិស្សិតថៃ ក៏ដូចជាជាមួយនឹងសាស្ត្រាចារ្យជនជាតិថៃ ដោយមិនមានការប្រកាន់និន្នាការ ឬរើសអើងជាតិសាសន៍ទេ។
តែក្រុមនិស្សិតកម្ពុជា បានបង្ហាញក្តីបារម្ភបន្តិចបន្តួចទំនាក់ទំនងនៅក្រៅសាលា ជាមួយនឹងប្រជាជនថៃ ខណៈដែលកម្ពុជានិងថៃ នៅមិនទាន់ដោះស្រាយបញ្ហាព្រំដែននៅឡើយនាពេលសព្វថ្ងៃ។ ក៏ប៉ុន្តែក្នុងរយៈពេល ២ ខែដំបូងនេះ ក្រុមនិស្សិតកម្ពុជា មិនជួបនឹងបញ្ហាអ្វីទេ៕ –
Credit: http://www.cen.com.kh
![376783_485067818233589_1167057667_n[1]](http://www.cambo-zone.org/wp-content/uploads/2014/11/376783_485067818233589_1167057667_n1.png)
